TAAL VOLCANO ADVISORY

29 Setyembre 2022

07:00 ng Gabi

 

Ito ay paunawa ukol sa pagtaas ng binubugang volcanic SO₂ ng Bulkang Taal.

 

Nagbuga ang Taal Main Crater ng 10,718 tonelada kada araw na volcanic sulfur dioxide o SO₂ gas nitong araw na nagdulot ng volcanic smog or vog sa Taal Caldera. Itinatayang maiihip ang ibinugang volcanic gas sa himpapawid patungong pangkalahatang kanluran batay sa datos ng air parcel trajectory ng DOST-PAGASA. Ang average SO₂ flux sa buwan ng Setyembre 2022 ay pumapatak sa 6,612 tonelada kada araw,  kadugtong ng mataas na pagbuga na nagsimula pa noong Hulyo 15, 2022. Simula rin ng pagbungad ng Agosto 2022, nagkaroon din ng pagsigabo ng pagbuga ng gas na nagdulot ng upwelling sa lawa ng Main Crater at paglabas ng usok o singaw na tumayog hanggang 2,500 metro mula sa TVI. Naiulat ang vog kaninang umaga ng mga mamamayan ng Munisipyo ng Laurel, Agoncillo at Sta. Teresita, Batangas.

 

Bilang paalala, ang vog ay binubuo ng mga pinong droplet na naglalaman ng volcanic gas tulad ng SO2 na acidic at maaaring magdulot ng pangangati ng mata, lalamunan at respiratory tract na may kalubhaan depende sa mga konsentrasyon ng gas at tagal ng pagkakalantad. Ang mga taong maaaring partikular na sensitibo sa vog ay ang mga may kondisyong pangkalusugan tulad ng hika, sakit sa baga at sakit sa puso, mga matatanda, mga buntis na kababaihan at mga bata. Para sa mga komunidad na maaaring maapektuhan ng vog, mangyaring alalahanin ang mga sumusunod.

 

1. Limitahan ang iyong pagkakalantad. Iwasan ang mga aktibidad sa labas, manatili sa loob ng bahay at isara ang mga pinto at bintana upang harangan ang vog.
2. Protektahan ang iyong sarili. Takpan ang iyong ilong, mainam gamitin ang N95 facemask. Uminom ng maraming tubig upang mabawasan ang anumang pangangati o paninikip ng lalamunan. Kung kabilang sa partikular na sensitibong grupo ng mga tao sa itaas, bantayan ang iyong sarili at humingi ng tulong sa isang doktor o sa barangay health unit kung kinakailangan, lalo na Kung malalang epekto ang nararanasan.

 

Bilang karagdagan, maaaring mabuo ang acid rain sa mga panahon ng pag-ulan at paglabas ng gas ng bulkan sa mga lugar kung saan ang plume ay kumalat, na nagdudulot ng pinsala sa mga pananim at nakakaapekto sa mga metal na bubong ng mga bahay at gusali.

 

Ang DOST-PHIVOLCS ay nagpapaalala sa publiko na nakataas ang Alert Level 1 sa Bulkang Taal, na nangangahulugang wala sa normal na kalagayan ang bulkan at hindi pa lumilipas ang aktibidad o ang banta ng pagputok nito. Kung magkaroon ng paglala o matinding pagbabago sa mga monitoring parameters, maaaring itaas muli ang antas ng alerto sa Alert Level 2. Sa kabilang dako, kung manumbalik sa baseline na antas ang mga monitoring parameters matapos ang sapat na panahon ng pagmamanman, maaari namang ibaba ang antas ng alerto sa Alert Level 0. Sa kasalukuyang Alert Level 1, maaaring maganap ang biglaang pagputok ng steam o phreatic explosions, volcanic earthquakes, manipis na ashfall at pagipon o pagbuga ng mga nakalalasong gas sa kapaligiran ng Taal Volcano Island o TVI. Mariing iminumungkahi ng DOST-PHIVOLCS ang mahigpit na pagbabawal sa pagpasok sa TVI, na siyang Permanent  Danger Zone o PDZ ng bulkang Taal, lalung-lalo na sa palibot at loob ng Main Crater at ng Daang Kastila fissure. Hinihimok ang mga Local Government Units (LGU) na patuloy na suriin ang mga pinsala at kalagayan ng kalsada’t daanan at ang pagpalakas ng paghahanda, contingency, at mga pamamaraan ng komunikasyon para kung sakaling magbago ang kalagayan ng bulkan. Pinapayuhan ang mga tao na mag-ingat sa paggalaw ng lupa na nagkaroon ng bitak (fissure), maaaring pag-ulan ng abo at mahihinang lindol. Ang mga pamunuan ng civil aviation ay hinihimok na magpayo sa mga piloto na huwag lumipad malapit sa bulkan upang makaiwas sa biglaang pagbuga ng abo at malalaking tipak ng bato o paglipad ng abo dala ng malakas na hangin na maaring magdulot ng panganib sa mga sasakyang panghimpapawid.

 

Ang DOST-PHIVOLCS ay masusing nagbabantay sa kalagayan ng Bulkang Taal at agarang ipababatid ang anumang pagbabago nito sa lahat ng kinauukulan.

 

DOST-PHIVOLCS