TAAL VOLCANO ADVISORY

11 Hulyo 2024

Ika-06:00 ng gabi

 

 

Ito ay paunawa ukol sa pagtaas at patuloy na pagbuga ng volcanic SO₂ ng Bulkang Taal.

 

Nagbuga ang Taal Main Crater ng 11,745 tonelada/araw na volcanic sulfur dioxide o SO₂ gas ngayong araw, 11 Hulyo 2024. Batay sa mga visual monitor, nagsingaw ng katamtaman hanggang makakapal na plume na umabot ng 2,400 metrong taas mula sa Main Crater bago napadpad sa kagawiang kanluran. Ang Taal ay nagbuga na ng may average na 7,777 tonelada/araw na SO₂ nitong taong at walang-patid na nagbubuga nito simula pa noong 2021. Ayon sa PAGASA, inaasahan ang posibleng paghina ng hangin sa mga susunod na araw na maaring humantong sa pag-ipon ng SO₂ at pamumuo ng volcanic smog o vog sa kalakhang Taal. Ang matagal na pagkakalantad sa volcanic SO₂ ay maaring magdulot ng pangangati ng mga mata, lalamunan at respiratory tract. May mga taong sadyang mas maselan sa masamang epekto nito kabilang ang mga may karamdaman gaya ng hika, sakit sa baga’t puso, mga matatanda, mga buntis at mga bata. Sa mga pamayanan na maaaring maapektuhan ng volcanic SO₂, mangyaring tandaan ang mga sumusunod:

 

1. Bawasan ang pagkakalantad o exposure. Iwasan ang mga gawaing panlabas,  manatili na lamang sa loob ng bahay at isara ang mga bintana at pintuan upang maiwasang makapasok ang volcanic gas sa loob ng bahay.
2. Protektahan ang sarili. Gumamit ng nararapat na N95 face mask o gas mask. Uminom ng maraming tubig upang maibsan ang iritasyon o paninikip ng daluyan ng paghinga. Kung kabilang sa mga maselang sa SO₂, siguraduhing subaybayan ang inyong kalagayan at agarang magpatingin sa doktor o sa barangay health unit kung kinakailangan, lalo na kung may malalang epekto na nararanasan. 

 

Ang DOST-PHIVOLCS ay nagpapaalala sa publiko na nakataas ang Alert Level 1 sa Bulkang Taal, na nangangahulugang may mababang aktibidad ang bulkan at hindi pa lumilipas ang banta ng pagputok at ng mga kaakibat na volcanic hazards nito. Sa Alert Level 1, maaaring maganap ang biglaang steam-driven o phreatic explosions, volcanic earthquakes, manipis na ashfall at pag-ipon o pagbuga ng mga nakalalasong gas sa kapaligiran ng Taal Volcano Island o TVI. Ang pagbuga ng mataas na sukat ng volcanic SO₂ ay patuloy na nagbabanta ng masamang epekto sa kalusugan ng mga komunidad sa paligid ng Taal Caldera na madalas na nakakasagap ng volcanic gas. Mariing iminumungkahi ng DOST-PHIVOLCS ang mahigpit na pagbawal sa pagpasok sa TVI, na siyang Permanent  Danger Zone o PDZ ng bulkang Taal, lalung-lalo na sa palibot at loob ng Main Crater at ng Daang Kastila fissure. Hinihimok ang mga Local Government Units (LGU) na patuloy na subaybayan at suriin ang exposure ng kanilang mga pamayanan sa volcanic SO₂ at ang maaring maging epekto nito upang makapagsagawa ng karampatang lunas sa mga panganib nito sa kanilang mga mamamayan.

 

Ang DOST-PHIVOLCS ay masusing nagbabantay sa kalagayan ng Bulkang Taal at agarang ipababatid ang anumang pagbabago nito sa lahat ng kinauukulan.

 

 

 

DOST-PHIVOLCS